Diğer Münâcât
-Bahtî (Sultan I. Ahmed)-
Dil hânesi pür-nûr olur envâr-ı zikrullah ile
İklîm-i ten ma‘mûr olur mi‘mâr-ı zikrullah ile
Her müşkil iş âsân olur derd-i dile dermân olur
Cânın içinde cân olur esrâr-ı zikrullah ile
Gamgîn gönüller şâd olur dembesteler âzâd olur
Gümgeşteler irşâd olur âsâr-ı zikrullah ile
Zikreyle Hakk’ı her nefes Allah bes bâkî heves
Bes gayrıdan ümmîdi kes tekrâr-ı zikrullah ile
Gör ehl-i hâlin fırkasın çâk etdi ceyb-i hırkasın
Devreyle zikrin halkasın pergâr-ı zikrullah ile
Terk et cihân ârâyişin nefsin gider âlâyişin
Bu cân ü dil âsâyişin efkâr-ı zikrullah ile
Bahtî sana ikrâr ider tevhîdini tekrâr ider
İhlâsını iş‘ar ider eş‘âr-ı zikrullah ile
Şiir Notları:
(Şiirleri İngilizce dil seçeneğini seçerek okumalı, aksi hâlde çeviri bozuk veya hatalı çıkıyor.) -
“Müstefilün/ müstefilün/ müstefilün/ müstefilün”